८. हिरीसुत्तवण्णना

१८. निसेधेतीति निवारेति पवत्तितुं न देति. पुच्छति देवता. अपहरन्तोति अपनेन्तो, यथा सब्बेन सब्बं अक्कोसवत्थु न होति, एवं परिहरन्तोति अत्थो. बुज्झति सारथिविधं. अत्तनि निपातं न देति, आजानीयो हि युत्तं पजानाति. अभूतेन अभूतक्कोसेन परिमुत्तो नाम नत्थि बालानञ्च जनानं परापवादे युत्तपयुत्तभावतो. तेनाह भगवा –

‘‘निन्दन्ति तुण्हिमासीनं, निन्दन्ति बहुभाणिनं;

मितभाणिम्पि निन्दन्ति, नत्थि लोके अनिन्दितो’’ति. (ध. प. २२७);

तनुयाति वा कतिपया. तेनाह ‘‘अप्पका’’ति. सदा सताति हिरिनिसेधभावे कारणवचनं. पप्पुय्याति पत्वा अधिगन्त्वा. वानतो निक्खन्तत्ता निब्बानं, असङ्खतधातु.

हिरीसुत्तवण्णना निट्ठिता.