६. पिण्डचारिकवत्तकथा

३६६. पिण्डचारिकवत्ते एवं विनिच्छयो वेदितब्बोति योजना. कप्पासं वा गहेत्वाति सम्बन्धो. यञ्चाति यञ्च किञ्चि वत्थुं, गहेत्वाति सम्बन्धो. करोन्ती ठिता वाति करोन्ती हुत्वा ठिता वा. तन्ति कम्मं. न च भिक्खादायिकायाति इत्थिलिङ्गवसेन वुत्तत्ता इत्थिया एव मुखं न उल्लोकेतब्बन्ति अत्थं पटिक्खिपन्तो आह ‘‘इत्थी वा होतू’’तिआदि. ‘‘भिक्खादानसमये’’ति इमिना अञ्ञस्मिं समये ओलोकेन्तोपि नत्थि दोसोति दस्सेति. एकस्मिं काले भिक्खाय ददमानाय सब्बकालम्पि न ओलोकेतब्बन्ति अनिच्छितत्थं पटिक्खिपति.