११४. सङ्घभेदे अनापत्तिवस्सच्छेदकथा

२०२. भिन्नोति एत्थ तपच्चयस्स अतीतत्थे अयुत्तभावं दस्सेन्तो आह ‘‘भिन्ने सङ्घे करणीयं नत्थी’’ति. यो पनाति सङ्घो पन. इदं ‘‘भिज्जिस्सती’’तिपदे कत्ता, ‘‘आसङ्कितो’’तिपदे कम्मं. ‘‘भिज्जिस्सती’’ति इमिना भिन्नोति एत्थ तपच्चयस्स अनागतत्थे पवत्तभावं दस्सेति. भिक्खुनीहि सङ्घो भिन्नोति एत्थ किं भिक्खुनीहि सङ्घो भिन्नोति दट्ठब्बोति आह ‘‘न भिक्खुनीहि सङ्घो भिन्नोति दट्ठब्बो’’ति. एतन्ति भिक्खुनीहि अभिन्नभावं. एता पनाति भिक्खुनियो पन. तन्ति सङ्घं. एतन्ति ‘‘सम्बहुलाहि भिक्खुनीहि सङ्घो भिन्नो’’ति वचनं.