४०. निस्सयमुच्चनककथा

१०३. ओगणेनाति एत्थ ओत्यूपसग्गो लामकत्थवाचकोति आह ‘‘परिहीनगणेना’’ति. अत्तनो वुड्ढतरस्सेव भिक्खुस्स सन्तिके निस्सयो गहेतब्बोति आह ‘‘सचायं वुड्ढतर’’न्तिआदि. तत्थ अयन्ति अब्यत्तो भिक्खु. उपसम्पदायाति उपसम्पादेत्वा. आयस्मतोति आयस्मन्तं, उपयोगत्थे चेतं सामिवचनं. आयस्मतो वा ओवादन्ति योजना. सब्बत्थाति सब्बेसु. आपुच्छनेसूति दिसापक्कमनादिअत्थाय आपुच्छनेसु. एत्थाति इमस्मिं निस्सयवसनट्ठाने. तन्ति तत्तकं सुतं. तस्साति सुतस्स.