८. उपस्सुतिसिक्खापदं

४७१. अट्ठमे ‘‘अधिकरणजातान’’न्ति एत्थ अधिकरणस्स पकरणतो विवादाधिकरणभावञ्च विसेसनपरपदभावञ्च दस्सेन्तो आह ‘‘उप्पन्नविवादाधिकरणान’’न्ति. तत्थ उप्पन्नसद्देन जातसद्दस्सत्थं दस्सेति. विवादसद्देन अधिकरणस्स सरूपं दस्सेति. सुय्यतीति सुति वचनं, सुतिया समीपं उपस्सुति ठानन्ति अत्थं दस्सेतुं वुत्तं ‘‘सुतिसमीप’’न्ति. ‘‘समीप’’न्ति इमिना उपसद्दस्सत्थं दस्सेति. ‘‘यत्था’’तिआदिना ‘‘उपस्सुती’’ति एत्थ उपसद्दस्स पधानत्ता तस्स सरूपं दस्सेति. यत्थाति यस्मिं ठाने. मन्तेन्तन्ति एत्थ उपयोगवचनस्स भुम्मत्थे अधिप्पेतत्ता वुत्तं ‘‘मन्तयमाने’’ति.

४७३. ‘‘वूपसमिस्सामी’’ति एत्थ इधातुया गत्यत्थं दस्सेतुं वुत्तं ‘‘वूपसमं गमिस्सामी’’ति. अकारकभावन्ति निद्दोसभावं. सोतुकामताय गमनवसेन सिया किरियन्ति योजना. परतोपि एसेव नयोति. अट्ठमं.