४. पहारसिक्खापदं

४४९. चतुत्थे कस्मा छब्बग्गिया सत्तरसवग्गियानं पहारं देन्ति, ननु अकारणेन पहारं देन्तीति आह ‘‘आवुसो’’तिआदि. इमिना यथा वदन्ति, तथा अकतत्ता पहारं देन्तीति दस्सेति.

४५१. सचेपीति एत्थ पिसद्देन सचे अमरति, का नाम कथा, पाचित्तियमेवाति दस्सेति. पहारेनाति पहारहेतुना. यथाति येनाकारेन. अयन्ति भिक्खु. न विरोचतीति न सोभति.

४५२. ‘‘अनुपसम्पन्नस्सा’’ति एत्थ अकारस्स अञ्ञत्थं दस्सेतुं वुत्तं ‘‘गहट्ठस्स वा’’तिआदि. पब्बजितस्स वाति परिब्बाजकस्स वा सामणेरस्स वा.

४५३. ‘‘केनची’’ति पदस्स अत्थं दस्सेतुं वुत्तं ‘‘मनुस्सेन वा’’तिआदि. ततोति विहेठनतो, इमिना मोक्खस्स अपादानं दस्सेति, ‘‘अत्तनो’’ति इमिना सम्बन्धं दस्सेति. ‘‘पत्थयमानो’’ति इमिना ‘‘अधिप्पायो’’ति पदस्सत्थं दस्सेति. मुग्गरेन वाति चतुहत्थदण्डस्स अद्धेन दण्डेन वा. सोति चोरादिकोति. चतुत्थं.