६. थेय्यसत्थसिक्खापदं

४०७. छट्ठे ‘‘पटियालोक’’न्ति एत्थ आलोकसद्देन सूरियो वुत्तो उपचारेन. सूरियो हि पुरत्थिमदिसतो उग्गन्त्वा पच्छिमदिसं गतो, तस्मा सूरियसङ्खातस्स आलोकस्स पटिमुखं ‘‘पटियालोक’’न्ति वुत्ते पच्छिमदिसायेव गहेतब्बाति आह ‘‘पच्छिमं दिसन्ति अत्थो’’ति. कम्मिकाति कम्मे युत्ता पयुत्ता.

४०९. राजानन्ति एत्थ रञ्ञो सन्तकं ‘‘राजा’’ति वुच्चति उपचारेन, अथ वा रञ्ञो एसो ‘‘राजा’’ति कत्वा रञ्ञो सन्तकं ‘‘राजा’’ति वुच्चति. थेय्यन्ति थेनेत्वा ‘‘सक्कच्च’’न्तिआदीसु (पाचि. ६०६) विय निग्गहीतागमो होति. राजानं, रञ्ञो सन्तकं वा थेय्यं थेनेत्वा गच्छन्तीति अत्थो. इति इममत्थं दस्सेन्तो आह ‘‘राजानं वा थेनेत्वा’’तिआदि.

४११. चतूसु विसङ्केतेसु द्वीहि अनापत्ति, द्वीहि आपत्तियेवाति. छट्ठं.