३. भिक्खुनुपस्सयसिक्खापदं

१६२. ततिये ‘‘ओवदति पाचित्तियस्सा’’ति सामञ्ञतो वुत्तेपि विसेसतो अत्थो गहेतब्बोति आह ‘‘अट्ठहि गरुधम्मेहि ओवदन्तस्सेव पाचित्तिय’’न्ति. इतोति इमस्मा सिक्खापदम्हा. यत्थ यत्थाति यस्मिं यस्मिं सिक्खापदे. सब्बत्थ तत्थ तत्थाति योजनाति. ततियं.

पकिण्णककथा

एत्थाति इमस्मिं सिक्खापदे. इदं पकिण्णकं वुत्तन्ति सम्बन्धो. तीणि पाचित्तियानीति भिक्खुनो असम्मतत्ता एकं पाचित्तियं, सूरियस्स अत्थङ्गतत्ता एकं, भिक्खुनुपस्सयं उपसङ्कमितत्ता एकन्ति तीणि पाचित्तियानि. कथन्ति केन कारणेन होतीति योजना. तत्थाति भिक्खुनुपस्सयं. तस्सेवाति सम्मतस्सेव भिक्खुनो. अञ्ञेन धम्मेनाति गरुधम्मेहि अञ्ञेन धम्मेन. दिवा पनाति सूरियुग्गमनतो तस्स अनत्थङ्गतेयेवाति.