३. ततियपाटिदेसनीयसिक्खापदं

५६२. ततिये ‘‘उभतो’’ति एत्थ करणत्थे तोति आह ‘‘द्वीही’’ति. ‘‘उभतोपसन्न’’न्ति ब्यासोपि समासोपि युत्तोयेव, समासे तोपच्चयस्स अलोपो होति. ‘‘उभतो’’तिपदस्स सरूपं दस्सेतुं वुत्तं ‘‘उपासकेनपि उपासिकायपी’’ति. कस्मा उभतो पसन्नं होतीति आह ‘‘तस्मिं किरा’’तिआदि. यस्मा तस्मिं कुले…पे… सोतापन्नायेव होन्ति किर, तस्मा ‘‘उभतोपसन्न’’न्ति वुत्तं होति. ‘‘सचेपी’’ति एत्थ पिसद्देन असीतिकोटिधनतो अधिकम्पि सम्पिण्डेति. हायनस्स कारणं दस्सेति ‘‘यस्मा’’तिआदिना.

५६९. ‘‘घरतो नीहरित्वा’’ति एत्थ ‘‘नीहरित्वा’’ति पदस्स कम्मं दस्सेतुं वुत्तं ‘‘आसनसालं वा विहारं वा’’ति. ‘‘आनेत्वा’’तिइमिना नीपुब्बहरधातुया अत्थं दस्सेति. द्वारेति अत्तनो गेहद्वारेति. ततियं.