४७. सुद्धिनिद्देसवण्णना

४५५. देसना संवरो एट्ठि, पच्चवेक्खण भेदतोति (पारा. अट्ठ. २.५८५; विसुद्धि. १.१९) देसनासुद्धि संवरसुद्धि परियेट्ठिसुद्धि पच्चवेक्खणसुद्धीति एवं चतुब्बिधा सुद्धीति अत्थो. इदानि ताहि सुद्धीहि विसुज्झनके दस्सेतुं ‘‘पातिमोक्खसंवरसम्मत’’न्तिआदिमाह.

४५६. ‘‘पुन एवं न करिस्स’’न्ति चित्ताधिट्ठानसंवरा यस्मा सुज्झति इन्द्रियसंवरो, तस्मा इन्द्रियसंवरो ‘‘संवरसुद्धी’’ति वुत्तोति सम्बन्धो.

४५७. पहायानेसनन्ति अनेसनं पहाय धम्मेन उप्पादेन्तस्स पच्चयेति पाठसेसो.

४५८. ‘‘पटिसङ्खा योनिसो चीवरं पटिसेवामि…पे… उप्पन्नानं वेय्याबाधिकानं…पे… परमताया’’ति (म. नि. १.२३; अ. नि. ६.५८) च एवं चतूसुपि पच्चयेसु यथावुत्तपच्चवेक्खणसुज्झनाति अत्थो. एत्थ पन दुविधं पच्चवेक्खणं पटिलाभकाले च परिभोगकाले च. पटिलाभकाले हि धातुवसेन वा पटिक्कूलवसेन वा पच्चवेक्खित्वा ठपितचीवरादीनि ततो उत्तरि परिभुञ्जन्तस्स अनवज्जोव परिभोगो, परिभोगकालेपि. सुद्धिविनिच्छयो.

सुद्धिनिद्देसवण्णना निट्ठिता.