४. रजननिद्देसवण्णना

५८. इदानि तेसं चीवरानं रजनविधानं दस्सेतुं ‘‘रजनानि चा’’ति वुत्तं. तत्थ ‘‘अनुजानामि, भिक्खवे, छ रजनानि मूलरजनं खन्धरजनं तचरजनं पत्तरजनं पुप्फरजनं फलरजन’’न्ति (महाव. ३४४) एवं भगवता अनुञ्ञातत्ता ‘‘छप्पकारानि अनुञ्ञातानि सत्थुना’’ति वुत्तं.

५९. तत्थ मूलेति मूलरजनेति अत्थो. हलिद्दिं विवज्जिय सब्बं लब्भन्ति सम्बन्धो. एवं सेसेसुपि. तुङ्गहारको नाम एको सकण्टकरुक्खो, तस्स हरितालवण्णं खन्धरजनं होति. गिहिपरिभुत्तं पन अल्लिपत्तेन एकवारं रजितुं वट्टति. फलरजने अकप्पियं नाम नत्थि, सब्बं वट्टतीति. रजनविनिच्छयो.

रजननिद्देसवण्णना निट्ठिता.