२९. मिच्छाजीवविवज्जनानिद्देसवण्णना

२०९. चुण्णन्ति सिरीसचुण्णादिकन्ति अत्थो. मत्तिकाति पकतिमत्तिका वा पञ्चवण्णा वा सुद्धा कुङ्कुट्ठआदिका वा. कुलसङ्गहाति एतेहि सङ्गहितानं सन्तिके लाभासाय कुलसङ्गहत्थन्ति अत्थो. एत्थ पन इमेहि सङ्गहितानं सन्तिके ‘‘किञ्चि लभिस्सामी’’ति सङ्घिकं वा पुग्गलिकं वा दातुं न वट्टति एव. इमिना पन नयेन लद्धं पञ्चन्नम्पि सहधम्मिकानं न वट्टति, मिच्छाजीवञ्च होति.

२१०-२११. लाभासाय दायकानं दारके उक्खिपित्वा परिभटभावो पारिभटकता, ताय पारिभटकताय न जीवयेति सम्बन्धो. सेसेसुपि एसेव नयो. खेत्तादीसु पेसितस्स गमनं पहेणकम्मं. सासनप्पटिसासनहरणं दूतकम्मं. पेसितस्स गेहतो गेहगमनं जङ्घपेसनियं. लाभासाय लञ्जदानमनुप्पदानं. अञ्ञेन वापीति अङ्गविज्जादिना.

२१२. विञ्ञत्तीति (पारा. ५१५ आदयो; पारा. अट्ठ. २.५१५ आदयो) अञ्ञातकविञ्ञत्ति. अनेसनाति पुब्बे वुत्तेन पुप्फदानादिना पच्चयेसना. कुहनादीहीति (विभ. ८६१; विभ. अट्ठ. ८६१; महानि. ८७) कुहना लपना नेमित्तकता निप्पेसिकता लाभेन लाभं निजिगीसनताति इमेहि पञ्चहि वत्थूहीति अत्थो. मिच्छाजीवविनिच्छयो.

मिच्छाजीवविवज्जनानिद्देसवण्णना निट्ठिता.