२७. असंवासिकनिद्देसवण्णना

१९८. उक्खित्तोति आपत्तिया अदस्सने, अप्पटिकम्मे, पापिकाय दिट्ठिया अप्पटिनिस्सग्गे वा उक्खित्तकोति तिविधोपि इध उक्खित्तो गहितो. अनुपसम्पन्नोति इमिना सिक्खमानसामणेरसामणेरीसिक्खापच्चक्खातका गहिताति वेदितब्बा. छिन्नमूलको नाम अन्तिमवत्थुं अज्झापन्नको. नानासंवासोति लद्धिनानासंवासको. ‘‘नानासीमाय ठितचतुत्थो कम्मं करेय्य, इद्धिया वेहासे ठितचतुत्थो कम्मं करेय्य, अकम्मं न च करणीय’’न्ति हि वुत्तत्ता इमेपि ‘‘असंवासिका’’ति वुत्ता. एतेसु पन उक्खित्तकेहि सद्धिं उपोसथादीनि करोन्तो पाचित्तियं आपज्जति. निस्सीमट्ठवेहासट्ठेहि करोन्तस्स कम्मं कुप्पति, दुक्कटञ्च होति, इतरेहि दुक्कटं. असंवासिकविनिच्छयो.

असंवासिकनिद्देसवण्णना निट्ठिता.