२४. अञ्जनीनिद्देसवण्णना

१८२. वट्टा वा अट्ठसोळसंसा वा मट्ठा पुप्फलतादीहि अचित्तका अञ्जनी वट्टतीति अत्थो. तिस्सोपि वट्टन्ति, एकाय वा द्वीसु वा कथा एव नत्थीति अधिप्पायो. लेखाति वट्टलेखा. बन्धितुन्ति पिधानकबन्धनत्थं.

१८३. रूपन्ति सकुणरूपादि. यदि च एदिसं अञ्ञेहि कतं लभति, घंसित्वा वा छिन्दित्वा वा यथा वा न पञ्ञायति, तथा सुत्तेन वेठेत्वा वळञ्जेतब्बं.

१८४. थविकाति अञ्जनिथविका. अञ्जनिसलाकापि लब्भतीति सम्बन्धो.

१८५-६. अट्ठीति (महाव. २६६; महाव. अट्ठ. २६४) मनुस्सट्ठिं ठपेत्वा अवसेसट्ठि. विसाणदन्तेसु अकप्पियं नाम नत्थि. आमलककक्कादीहि कता फलमया. तम्मयाति इध वुत्तेहेव निब्बत्ता. अञ्जनीविनिच्छयो.

अञ्जनीनिद्देसवण्णना निट्ठिता.