२१. चम्मनिद्देसवण्णना

१७३. इदानि ‘‘अनुजानामि, भिक्खवे, सब्बपच्चन्तिमेसु जनपदेसु चम्मानि अत्थरणानि एळकचम्मं अजचम्मं मिगचम्म’’न्ति (महाव. २५९) एवं वुत्तचम्मानि दस्सेतुं ‘‘मिगाजेळकचम्मानी’’तिआदिमाह. परिभुञ्जितुन्ति (महाव. अट्ठ. २६२) मञ्चादीसु यत्थ कत्थचि अत्थरित्वा निपज्जितुं वा निसीदितुं वा वट्टन्तीति अत्थो. रोहितेणीपसदा च कुरुङ्गा च च-सद्देन अञ्ञेपि वाळमिगा मिगमातुकादयोपि मिगजातिका एवाति अधिप्पायो.

१७४. अनुञ्ञातत्तया अञ्ञन्ति –

‘‘मक्कटो काळसीहो च, सरभो कदलीमिगो;

ये च वाळमिगा केचि, तेसं चम्मं न वट्टती’’ति. –

एत्थ वाळमिगग्गहणेन वुत्तावसेसा अन्तमसो गोमहिंसादयो गहिताति वेदितब्बा. थविकाति उपाहनकोसकसत्थकोसककुञ्चिककोसकाति वेदितब्बा, न पत्तत्थविकादयो. चम्मविनिच्छयो.

चम्मनिद्देसवण्णना निट्ठिता.