७. पवारणानिद्देसो

पवारणाति –

७३. येनीरियापथेनायं, भुञ्जमानो पवारितो;

ततो अञ्ञेन भुञ्जेय्य, पाचित्तिनतिरित्तकं.

७४. असनं भोजनञ्चेव, अभिहारो समीपता;

कायवाचापटिक्खेपो, पञ्चअङ्गा पवारणा.

७५. ओदनो सत्तु कुम्मासो, मच्छो मंसञ्च भोजनं;

सालि वीहि यवो कङ्गु, कुद्रूसवरगोधुमा;

सत्तन्नमेसं धञ्ञानं, ओदनो भोज्जयागु च.

७६. सामाकादितिणं कुद्रूसके वरकचोरको;

वरके सालियञ्चेव, नीवारो सङ्गहं गतो.

७७. भट्ठधञ्ञमयो सत्तु, कुम्मासो यवसम्भवो;

मंसो च कप्पियो वुत्तो, मच्छो उदकसम्भवो.

७८. भुञ्जन्तो भोजनं कप्प-मकप्पं वा निसेधयं;

पवारेय्याभिहटं कप्पं, तन्नामेन इमन्ति वा.

७९. लाजा तंसत्तुभत्तानि, गोरसो सुद्धखज्जको;

तण्डुला भट्ठपिट्ठञ्च, पुथुका वेळुआदिनं.

८०. भत्तं वुत्तावसेसानं, रसयागु रसोपि च;

सुद्धयागुफलादीनि, न जनेन्ति पवारणं.

८१. पवारितेन वुट्ठाय, अभुत्तेन च भोजनं;

अतिरित्तं न कातब्बं, येन यं वा पुरे कतं.

८२. कप्पियं गहितञ्चेवु-च्चारितं हत्थपासगं;

अतिरित्तं करोन्तेवं, ‘‘अलमेत’’न्ति भासतु.

८३. न करेनुपसम्पन्न-हत्थगं पेसयित्वापि;

कारेतुं लब्भते सब्बो, भुञ्जितुं तमकारकोति.