८. कालिकनिद्देसो

कालिका चाति –

८४. पटिग्गहिता चत्तारो, कालिका यावकालिकं;

यामकालिकं सत्ताह-कालिकं यावजीविकं.

८५. पिट्ठं मूलं फलं खज्जं, गोरसो धञ्ञभोजनं;

यागुसूपप्पभुतयो, होन्तेते यावकालिका.

८६. मधुमुद्दिकसालूक-चोचमोचम्बजम्बुजं;

फारुसं नग्गिसन्तत्तं, पानकं यामकालिकं.

८७. सानुलोमानि धञ्ञानि, ठपेत्वा फलजो रसो;

मधूकपुप्फमञ्ञत्र, सब्बो पुप्फरसोपि च.

८८. सब्बपत्तरसो चेव, ठपेत्वा पक्कडाकजं;

सीतोदमद्दितोदिच्च-पाको वा यामकालिको.

८९. सप्पिनोनीततेलानि, मधुफाणितमेव च;

सत्ताहकालिका सप्पि, येसं मंसमवारितं.

९०. तेलं तिलवसेरण्ड-मधुसासपसम्भवं;

खुद्दाभमरमधुकरि-मक्खिकाहि कतं मधु;

रसादिउच्छुविकति, पक्कापक्का च फाणितं.

९१. सवत्थुपक्का सामं वा, वसा काले अमानुसा;

अञ्ञेसं न पचे वत्थुं, यावकालिकवत्थुनं.

९२. हलिद्दिं सिङ्गिवेरञ्च, वचत्तं लसुणं वचा;

उसीरं भद्दमुत्तञ्चातिविसा कटुरोहिणी;

पञ्चमूलादिकञ्चापि, मूलं तं यावजीविकं.

९३. बिळङ्गं मरिचं गोट्ठ-फलं पिप्फलि राजिका;

तिफलेरण्डकादीनं, फलं तं यावजीविकं.

९४. कप्पासनिम्बकुटजपटोलसुलसादिनं;

सूपेय्यपण्णं वज्जेत्वा, पण्णं तं यावजीविकं.

९५. ठपेत्वा उच्छुनिय्यासं,

सरसं उच्छुजं तचं;

निय्यासो च तचो सब्बो,

लोणं लोहं सिला तथा.

९६. सुद्धसित्थञ्च सेवालो, यञ्च किञ्चि सुझापितं;

विकटादिप्पभेदञ्च, ञातब्बं यावजीविकं.

९७. मूलं सारं तचो फेग्गु, पण्णं पुप्फं फलं लता;

आहारत्थ मसाधेन्तं, सब्बं तं यावजीविकं.

९८. सब्बकालिकसम्भोगो, काले सब्बस्स कप्पति;

सति पच्चये विकाले, कप्पते कालिकत्तयं.

९९. कालयाममतिक्कन्ता, पाचित्तिं जनयन्तुभो;

जनयन्ति उभोपेते, अन्तोवुत्थञ्च सन्निधिं.

१००. सत्ताहकालिके सत्त, अहानि अतिनामिते;

पाचित्ति पाळिनारुळ्हे, सप्पिआदिम्हि दुक्कटं.

१०१. निस्सट्ठलद्धं मक्खेय्य, नङ्गं नज्झोहरेय्य च;

विकप्पेन्तस्स सत्ताहे, सामणेरस्सधिट्ठतो;

मक्खनादिञ्च नापत्ति, अञ्ञस्स ददतोपि च.

१०२. यावकालिकआदीनि, संसट्ठानि सहत्तना;

गाहापयन्ति सब्भावं, तस्मा एवमुदीरितं.

१०३. पुरे पटिग्गहितञ्च, सत्ताहं यावजीविकं;

सेसकालिकसम्मिस्सं, पाचित्ति परिभुञ्जतो.

१०४. यावकालिकसम्मिस्सं, इतरं कालिकत्तयं;

पटिग्गहितं तदहु, तदहेव च भुञ्जये.

१०५. यामकालिकसम्मिस्सं, सेसमेवं विजानियं;

सत्ताहकालिकमिस्सञ्च, सत्ताहं कप्पतेतरन्ति.