३५. परिक्खारनिद्देसो

परिक्खारोति –

२५९. पञ्चवण्णेहि सुत्तेहि, अन्तो बहि च सिब्बितुं;

गिरिकूटड्ढचन्दादिं, छत्ते पण्णे च छिन्दितुं.

२६०. घटकं वाळरूपं वा, दण्डे लेखा न वट्टति;

वट्टती दण्डबुन्दम्हि, अहिच्छत्तकसादिसं.

२६१. सिब्बितुं एकवण्णेन, पञ्जरं वा विनन्धितुं;

थिरत्थं वट्टती छत्ते, दण्डे लेखाव बन्धितुं.

२६२. अन्ते पट्टमुखे वापि, वेणि सङ्खलिकापि वा;

सूचिविकारमञ्ञं वा, चीवरे न च कप्पति;

कप्पबिन्दुविकारम्पि, पाळिकण्णिकआदिकं.

२६३. गण्ठिपासकपट्टापि, चतुक्कोणाव अग्घियं;

मुग्गरो कक्कटच्छादि-विकारं नेत्थ वट्टति.

२६४. कोणसुत्ता च पीळका, दुविञ्ञेय्याव कप्परे;

गन्धं तेलं व लाखं वा, रजने न च पक्खिपे.

२६५. रत्तं सङ्खेन मणिना, घट्टेय्यञ्ञेन वा न च;

घंसेय्य दोणियं कत्वा, पहारे न च मुट्ठिना.

२६६. कण्णकोणकसुत्तानि, रत्ते छिन्देय्य चीवरे;

लेखा न वट्टती धम्म-करणे छत्तवट्टियं.

२६७. लेखं ठपेत्वा मणिका, पीळका कुञ्चिकाय च;

पिप्फले च परिच्छेद-लेखा दण्डम्हि वट्टति.

२६८. मालाद्यरणियं पत्त-मण्डले भित्तिकम्म च;

हेट्ठा लेखाद्वयं उद्धं, अहिच्छत्तकसादिसं.

२६९. हित्वा कत्तरयट्ठिम्हि, सूचिसण्डासकेपि च;

यं किञ्चि गिरिकूटादि-वण्णमट्ठं न वट्टति.

२७०. बिम्बोहने भिसिमञ्च-पीठादिसयनासने;

सम्मुञ्जनिम्हि सङ्कार-छड्डने रङ्गभाजने.

२७१. पानीयभाजने पाद-पीठे कथलिकाय च;

पत्ताधारपिधानेसु, तालवण्टे च बीजने;

यं किञ्चि मालाकम्मादि-वण्णमट्ठमवारितं.

२७२. सेनासने पन द्वारकवाटादिप्पभेदने;

सोवण्णमयनुञ्ञातं, वण्णमट्ठम्हि का कथा.

२७३. विसाणनाळिलाब्वादिप्पभेदे तेलभाजने;

पुमित्थिरूपरहितं, वण्णमट्ठमवारितन्ति.