३४. पथवीनिद्देसो

पथवी चाति –

२४२. जाताजाताति दुविधा, सुद्धमत्तिकपंसुका;

जातादड्ढा च पथवी, बहुमत्तिकपंसुका;

चातुमासाधिकोवट्ठपंसुमत्तिकरासि च.

२४३. सुद्धसक्खरपासाणमरुम्बकथलवालुका;

दड्ढा च भूमि येभुय्यसक्खरादिमहीपि च;

दुतिया वुत्तरासि च, चातुमासोमवट्ठको.

२४४. द्वे भागा तीसु भागेसु, मत्तिका यस्स भूमिया;

येभुय्यमत्तिका एसा, सेसेसुपि अयं नयो.

२४५. पाचित्ति खणने जाते, जातसञ्ञिस्स दुक्कटं;

द्वेळ्हस्साजातसञ्ञिस्स, नापत्ताणापने तथा.

२४६. पहारे पहारापत्ति, खणमानस्स अत्तना;

एकायाणत्तिया एका, नानाणत्तीसु वाचसो.

२४७. ‘‘इमं ठानमिमं कन्दमिध वापिं खणेत्थ च;

जालेहग्गि’’न्ति वा वत्तुं, नियमेत्वा न वट्टति.

२४८. ‘‘थम्भस्सिमस्सावाटं वा, मत्तिकं जान माहर;

करोहि कप्पियञ्चे’’ति, वचनं वट्टतेदिसं.

२४९. असम्बद्धं पथविया, सुक्खकद्दमआदिकं;

कोपेतुं तनुकं लब्भमुस्सिञ्चनीयकद्दमं.

२५०. गण्डुप्पादं उपचिकामत्तिकं मूसिकुक्किरं;

चातुमासाधिकोवट्ठं, लेड्डादिञ्च न कोपये.

२५१. पतिते वापिआदीनं, कूले उदकसन्तिके;

पासाणे च रजे लग्गे, पतिते नवसोण्डिया.

२५२. वम्मिके मत्तिकाकुट्टे, अब्भोकासुट्ठिते तथा;

येभुय्यकथलट्ठाने, तिट्ठतिट्ठककुट्टको.

२५३. थम्भादिं गण्हितुं भूमिं, सञ्चालेत्वा विकोपयं;

धाराय भिन्दितुं भूमिं, कातुं वा विसमं समं.

२५४. सम्मुञ्जनीहि घंसितुं, कण्टकादिं पवेसितुं;

दस्सेस्सामीति भिन्दन्तो, भूमिं चङ्कमितुं पदं.

२५५. घंसितुं अङ्गपच्चङ्गं, कण्डुरोगी तटादिसु;

हत्थं वा धोवितुं भूमिं, घंसितुं न च कप्पति.

२५६. थम्भादिउजुकुद्धारो, पासाणादिपवट्टनं;

साखादिकड्ढनं रुक्खलताच्छेदनफालनं.

२५७. सेको पस्सावआदीनं, सुद्धचित्तस्स वट्टति;

अल्लहत्थं ठपेत्वान, रजग्गाहो च भूमिया.

२५८. अग्गिस्स अनुपादाने, कपाले इट्ठकाय वा;

पातेतुं लब्भते अग्गिं, भूमियं वावसे सतीति.