३१. विकप्पनानिद्देसो

विकप्पना चेवाति –

२२१. सम्मुखा परम्मुखाति, दुवे वुत्ता विकप्पना;

सम्मुखाय विकप्पेन्तो, ब्यत्तस्सेकस्स सन्तिके;

‘‘इमं चीवरं तुय्हं, विकप्पेमी’’ति भासये.

२२२. एत्तावता निधेतुंव, कप्पती न च कप्पति;

परिभोगादिकं तेन, अप्पच्चुद्धटभावतो.

२२३. ‘‘मय्हं सन्तकं परिभुञ्ज वा विस्सज्जेहि वा यथापच्चयं वा करोही’’ति –

तेन पच्चुद्धटेयेव, परिभोगादि कप्पति.

२२४. अपरा सम्मुखावेका, भिक्खुस्सेकस्स सन्तिके;

गहेत्वा नाममेकस्स, पञ्चन्नं सहधम्मिनं.

२२५. ‘‘इमं चीवरं तिस्सस्स भिक्खुनो, तिस्साय भिक्खुनिया, तिस्सस्स सामणेरस्स, तिस्साय सामणेरिया, तिस्साय सिक्खमानाय विकप्पेमी’’ति वत्तब्बं.

तेन भिक्खुना ‘‘तिस्सस्स भिक्खुनो, तिस्साय भिक्खुनिया, तिस्सस्स सामणेरस्स, तिस्साय सामणेरिया, तिस्साय सिक्खमानाय सन्तकं परिभुञ्ज वा विस्सज्जेहि वा यथापच्चयं वा करोही’’ति वत्तब्बं.

२२६. परम्मुखाविकप्पने-कस्सन्तिकेवमीरये;

‘‘इमं चीवरं तुय्हं विकप्पनत्थाय दम्मी’’ति.

२२७. तेन वत्तब्बो ‘‘को ते मित्तो वा सन्दिट्ठो वा’’ति. इतरेन चेवं वत्तब्बं ‘‘तिस्सो भिक्खू’’ति वा ‘‘तिस्सा भिक्खुनी’’ति वा ‘‘तिस्सो सामणेरो’’ति वा ‘‘तिस्सा सामणेरी’’ति वा ‘‘तिस्सा सिक्खमाना’’ति वा.

पुन तेन ‘‘अहं तिस्सस्स तिस्साय वा दम्मी’’ति विकप्पेत्वा तेनेव ‘‘तिस्सस्स भिक्खुनो, तिस्साय भिक्खुनिया, तिस्सस्स सामणेरस्स, तिस्साय सामणेरिया, तिस्साय सिक्खमानाय सन्तकं परिभुञ्ज वा विस्सज्जेहि वा यथापच्चयं वा करोही’’ति पच्चुद्धरितब्बं.

२२८. दूरसन्तिकत्तेकत्तबहुभावं विजानिय;

‘‘एतं इम’’न्ति ‘‘एतानि, इमानी’’तेत्थ योजये.

२२९. दसाहं मासमेकं वा, पञ्च वा कथिनत्थते;

पारिपूरत्थमूनस्स, पच्चासा सति मासकं;

नुप्पादयति निस्सग्गिं, नाधिट्ठितविकप्पितन्ति.