१३. समणकप्पनिद्देसो

समणकप्पाति –

१२५. भूतगामसमारम्भे, पाचित्ति कतकप्पियं;

नखेन वाग्गिसत्थेहि, भवे समणकप्पियं.

१२६. स मूलखन्धबीजग्ग-फळुबीजप्पभावितो;

आरम्भे दुक्कटं बीजं, भूतगामवियोजितं.

१२७. निब्बट्टबीजं नोबीज-मकतञ्चापि कप्पति;

कटाहबद्धबीजानि, बहिद्धा वापि कारये.

१२८. एकाबद्धेसु बीजेसु, भाजने वापि भूमियं;

कते च कप्पियेकस्मिं, सब्बेस्वेव कतं भवे.

१२९. निक्खित्ते कप्पियं कत्वा, मूलपण्णानि जायरुं;

कप्पियं पुन कारेय्य, भूतगामो हि सो तदा.

१३०. सपण्णो वा अपण्णो वा, सेवालोदकसम्भवो;

चेतियादीसु सेवालो, निब्बट्टद्वत्तिपत्तको;

भूतगामोव बीजम्पि, मूलपण्णे विनिग्गते.

१३१. घटादिपिट्ठे सेवालो, मकुळं अहिछत्तकं;

दुक्कटस्सेव वत्थूनि, फुल्लमब्यवहारिकं.

१३२. लाखानिय्यासछत्तानि, अल्लरुक्खे विकोपिय;

गण्हतो तत्थ पाचित्ति, छिन्दतो वापि अक्खरं.

१३३. पीळेतुं नाळिकेरादिं, दारुमक्कटकादिना;

छिन्दितुं गण्ठिकं कातुं, तिणादिं न च कप्पति.

१३४. भूतगामं व बीजं वा, छिन्द भिन्दोचिनाहि वा;

फालेहि विज्झ पच वा, नियमेत्वा न भासये.

१३५. इमं करोहि कप्पियं, इमं गण्हेदमाहर;

इमं देहि इमं सोधेहेवं वट्टति भासितुन्ति.