५. मञ्चपीठसिक्खापदवण्णना

अट्ठङ्गुलपादकन्ति भावनपुंसकनिद्देसो. ‘‘छेदनकं भेदनकसदिसमेवा’’ति इमिना ‘‘छेदनमेव छेदनकं, तं अस्स अत्थीति छेदनक’’न्ति इममत्थं अतिदिसति.

यथा पमाणमेव उपरि दिस्सति, एवं निखणित्वा वाति सचे पन न छिन्दितुकामो होति, यथा पमाणमेव उपरि दिस्सति, एवं भूमियं निखणित्वा वा. अट्टकं वा बन्धित्वाति उक्खिपित्वा तुलासङ्घाते ठपेत्वा अट्टं कत्वा.

मञ्चपीठसिक्खापदवण्णना निट्ठिता.