१. सहधम्मिकसिक्खापदवण्णना

सहधम्मिकं वुच्चमानोति सहधम्मिकेन वुच्चमानो. करणत्थे चेतं उपयोगवचनं. ‘‘पञ्चहि सहधम्मिकेहि सिक्खितब्बत्ता, तेसं वा सन्तकत्ता ‘सहधम्मिक’न्ति लद्धनामेन बुद्धपञ्ञत्तेन सिक्खापदेन वुच्चमानोति अत्थो’’ति (कङ्खा. अट्ठ. दुब्बचसिक्खापदवण्णना; पारा. अट्ठ. २.४२५-४२६) दुब्बचसिक्खापदे वुत्तत्ता ‘‘सहधम्मिकं वुच्चमानोति इमस्सत्थो दुब्बचसिक्खापदे वुत्तो’’ति वुत्तं. अनादरियभयाति अनादरकरणे भया, तत्थ पाचित्तियभयाति अत्थो. लेसेन एवं वदन्तस्साति उजुकं ‘‘न सिक्खिस्सामी’’ति अवत्वा ‘‘याव न अञ्ञं भिक्खु’’न्तिआदिना लेसेन वदन्तस्स.

सहधम्मिकसिक्खापदवण्णना निट्ठिता.