१. सञ्चिच्चसिक्खापदवण्णना

पाचित्तियन्ति अन्तमसो मञ्चपीठं सोधेन्तो मङ्गुलबीजकेपि पाणसञ्ञी निक्कारुणिकताय तं भिन्दन्तो अपनेति (पाचि. अट्ठ. ३८२), पाचित्तियं. तेनाह ‘‘तं खुद्दकम्पी’’तिआदि. उपक्कममहन्तताय अकुसलं महन्तं होतीति बहुक्खत्तुं पवत्तजवनेहि लद्धासेवनाय सन्निट्ठापकचेतनाय वसेन पयोगस्स महन्तत्ता अकुसलं महन्तं होति, महासावज्जं होतीति अधिप्पायो.

सञ्चिच्चसिक्खापदवण्णना निट्ठिता.