६. चीवरसिब्बनसिक्खापदवण्णना

सूचिं पवेसेत्वा पवेसेत्वा नीहरणेति आरापथे आरापथे पाचित्तियं. ‘‘सिब्बिस्सामी’’ति पन विचारेन्तस्स, छिन्दन्तस्सापि दुक्कटं. सतक्खत्तुम्पि विज्झित्वा सकिं नीहरन्तस्साति सकलसूचिं अनीहरन्तो दीघसुत्तप्पवेसनत्थं सतक्खत्तुम्पि विज्झित्वा सकिं नीहरन्तस्स. ‘‘सिब्बा’’ति वुत्तोति सकिं ‘‘चीवरं सिब्बा’’ति वुत्तो. निट्ठापेतीति सब्बं सूचिकम्मं परियोसापेति. तस्स आरापथे आरापथे पाचित्तियन्ति आणत्तस्स सूचिं पवेसेत्वा पवेसेत्वा नीहरणे एकमेकं पाचित्तियं.

उदायित्थेरन्ति लाळुदायित्थेरं. वुत्तलक्खणं सिब्बनं वा सिब्बापनं वाति ‘‘सूचिं पवेसेत्वा’’तिआदिना वुत्तलक्खणं सिब्बनं वा सिब्बापनं वा.

चीवरसिब्बनसिक्खापदवण्णना निट्ठिता.