६. दुतियसहसेय्यसिक्खापदवण्णना

मनुस्सित्थियाति जीवमानकमनुस्सित्थिया. ‘‘मतित्थी पन किञ्चापि पाराजिकवत्थुभूता, अनुपादिन्नपक्खे पन ठितत्ता सहसेय्यापत्तिं न करोती’’ति (वजिर. टी. पाचित्तिय ५५) वदन्ति. अदिस्समानरूपाहि पन यक्खिपेतीहि, मेथुनस्स अवत्थुभूताय च तिरच्छानगतित्थिया अनापत्ति. पठमदिवसेपीति पठमस्मिं विय सिक्खापदे न चतुत्थेयेव दिवसे, अथ खो इध पठमदिवसेपीति अत्थो. इमिना इध दिवसपरिच्छेदो नत्थीति दस्सेति. अङ्गेसु पन पाचित्तियवत्थुकसेनासनं, तत्थ मातुगामेन सह निपज्जनं, सूरियत्थङ्गमनन्ति तीणि अङ्गानीति अयम्पि विसेसो दट्ठब्बो.

दुतियसहसेय्यसिक्खापदवण्णना निट्ठिता.