७-१०. पटिबाहनादिसिक्खापदवण्णना

आनिसंसं दस्सेत्वा पटिबाहन्तियाति ‘‘एकिस्सा एकं साटकं नप्पहोति, आगमेथ ताव, कतिपाहेन उप्पज्जिस्सति, ततो भाजेस्सामा’’ति (पाचि. अट्ठ. ९१५) एवं आनिसंसं दस्सेत्वा पटिबाहन्तिया अनापत्ति.

अट्ठमनवमानि उत्तानत्थानेव.

सेसन्ति ‘‘धम्मिके वेमतिकाया’’तिआदिकं अवसेसं. तत्थ आनिसंसं दस्सेत्वा पटिबाहन्तियाति ‘‘भिक्खुनिसङ्घो जिण्णचीवरो, कथिनानिसंसमूलको महालाभो’’ति (पाचि. अट्ठ. ९३१) एवरूपं आनिसंसं दस्सेत्वा पटिबाहन्तिया अनापत्ति.

पटिबाहनादिसिक्खापदवण्णना निट्ठिता.

नग्गवग्गो ततियो.