४. तुवट्टवग्गो

१-३. एकमञ्चतुवट्टनादिसिक्खापदवण्णना

पठमं उत्तानत्थमेव.

ववत्थानं दस्सेत्वाति (पाचि. अट्ठ. ९४०) मज्झे कासायं वा कत्तरयट्ठिं वा अन्तमसो कायबन्धनम्पि ठपेत्वा निपज्जन्तीनं अनापत्तीति अत्थो.

ततियं उत्तानत्थमेव.

एकमञ्चतुवट्टनादिसिक्खापदवण्णना निट्ठिता.

४-९. नउपट्ठापनादिसिक्खापदवण्णना

परियेसित्वा अलभन्तियाति अञ्ञं उपट्ठायिकं अलभन्तिया. गिलानायाति सयं गिलानाय. आपदासूति तथारूपे उपद्दवे सति.

पञ्चमछट्ठसत्तम अट्ठमनवमानि उत्तानत्थानेव.

नउपट्ठापनादिसिक्खापदवण्णना निट्ठिता.

१०. चारिकनपक्कमनसिक्खापदवण्णना

धुरे निक्खित्तमत्तेति सचे धुरं निक्खिपित्वा पच्छा पक्कमति, आपत्तियेवाति अत्थो. अन्तराये सतीति दसविधेसु अन्तरायेसु अञ्ञतरस्मिं सति. ‘‘गच्छिस्सामी’’ति निक्खन्ता, नदी वा पूरा, वनदाहो वा आगतो, चोरा वा मग्गे होन्ति, मेघो वा उट्ठहति, निवत्तितुं वट्टति.

चारिकनपक्कमनसिक्खापदवण्णना निट्ठिता.

तुवट्टवग्गो चतुत्थो.