३. नग्गवग्गो

१-२. नग्गादिसिक्खापदवण्णना

इदन्ति इदं उदकसाटिकचीवरं.

दुतियं उत्तानत्थमेव.

नग्गादिसिक्खापदवण्णना निट्ठिता.

३. चीवरसिब्बनसिक्खापदवण्णना

विसिब्बेत्वाति विजटेत्वा. धुरं निक्खित्तमत्तेति धुरे निक्खित्तमत्ते, धुरं निक्खिपित्वा सचेपि पच्छा सिब्बति, आपत्तियेवाति अत्थो.

चीवरसिब्बनसिक्खापदवण्णना निट्ठिता.

४. सङ्घाटिचारसिक्खापदवण्णना

‘‘इदं मे चीवरं महग्घं ईदिसे चोरभये न सक्का धारेतुन्ति एवरूपासु आपदासू’’ति एत्थ पाठो. सो पन काकपदसञ्जनितमोहेहि लेखकेहि उपरिसिक्खापदे लिखितो. किञ्चापि तत्थ लिखितो, एत्थेव पन दट्ठब्बो.

सङ्घाटिचारसिक्खापदवण्णना निट्ठिता.

५. चीवरसङ्कमनीयसिक्खापदवण्णना

आपदासु वा धारेतीति सचे अपारुतं वा अनिवत्थं वा चोरा हरन्ति, एवरूपासू आपदासु धारेति, अनापत्ति.

चीवरसङ्कमनीयसिक्खापदवण्णना निट्ठिता.

६. गणचीवरसिक्खापदवण्णना

अञ्ञस्मिं परिक्खारेति यत्थ कत्थचि थालकादीनं वा सप्पितेलादीनं वा अञ्ञतरस्मिं. ‘‘समग्घकाले दस्सथा’’ति एवं आनिसंसं दस्सेत्वा निवारेन्तियाति ‘‘कित्तकं अग्घनकं दातुकामत्था’’ति पुच्छित्वा (पाचि. अट्ठ. ९०९) ‘‘एत्तकं नामा’’ति वुत्ते ‘‘आगमेथ ताव, इदानि वत्थं महग्घं, कतिपाहेन कप्पासे आहटे समग्घं भविस्सति, तस्मिं काले दस्सथा’’ति एवं आनिसंसं दस्सेत्वा निवारेन्तिया.

गणचीवरसिक्खापदवण्णना निट्ठिता.

७-१०. पटिबाहनादिसिक्खापदवण्णना

आनिसंसं दस्सेत्वा पटिबाहन्तियाति ‘‘एकिस्सा एकं साटकं नप्पहोति, आगमेथ ताव, कतिपाहेन उप्पज्जिस्सति, ततो भाजेस्सामा’’ति (पाचि. अट्ठ. ९१५) एवं आनिसंसं दस्सेत्वा पटिबाहन्तिया अनापत्ति.

अट्ठमनवमानि उत्तानत्थानेव.

सेसन्ति ‘‘धम्मिके वेमतिकाया’’तिआदिकं अवसेसं. तत्थ आनिसंसं दस्सेत्वा पटिबाहन्तियाति ‘‘भिक्खुनिसङ्घो जिण्णचीवरो, कथिनानिसंसमूलको महालाभो’’ति (पाचि. अट्ठ. ९३१) एवरूपं आनिसंसं दस्सेत्वा पटिबाहन्तिया अनापत्ति.

पटिबाहनादिसिक्खापदवण्णना निट्ठिता.

नग्गवग्गो ततियो.