८. अट्ठमवग्गवण्णना

पठमदुतियततियेसु ‘‘गिहिगता’’ति वा ‘‘कुमारिभूता’’ति वा न वत्तब्बा. वदन्ति चे, कम्मं कुप्पति.

एकादसमे छन्दं अविस्सज्जेत्वाति ‘‘यथासुख’’न्ति अवत्वा. एत्थ पन अयं विनिच्छयो – ‘‘पारिवासिकछन्ददानेना’’ति इदं उद्धरित्वा ‘‘वुट्ठिताय परिसाया’’ति (पाचि. ११६८) पदभाजनं वुत्तं. एतस्स पन समन्तपासादिकायं ‘‘वुट्ठिताय परिसायाति छन्दं विस्सज्जेत्वा कायेन वा वाचाय वा छन्दविस्सज्जनमत्तेन वा वुट्ठिताया’’ति (पाचि. अट्ठ. ११६७) वुत्तं. इध छन्दस्स पन अविस्सट्ठत्ता कम्मं कातुं वट्टतीति वुत्तं. तस्मा छन्दं अविस्सज्जेत्वाव द्वादसहत्थपासे विहरित्वा पुन सन्निपातकरणञ्च वट्टतीति लिखितं.

अट्ठमवग्गवण्णना निट्ठिता.