९. उक्खित्तसम्भोगसिक्खापदवण्णना

नवमे तथावादिनाति ‘‘तथाहं भगवता धम्म’’न्तिआदिवादिना. अकतानुधम्मेनाति अनुधम्मो वुच्चति आपत्तिया अदस्सने वा अप्पटिकम्मे वा पापिकाय दिट्ठिया अप्पटिनिस्सग्गे वा धम्मेन विनयेन उक्खित्तकस्स अनुलोमवत्तं दिस्वा कतओसारणा, सो ओसारणसङ्खातो अनुधम्मो यस्स न कतो, अयं अकतानुधम्मो नाम, तादिसेन सद्धिन्ति अत्थो. सम्भुञ्जेय्य वाति आमिससम्भोगं वा धम्मसम्भोगं वा करेय्य. संवसेय्य वाति उपोसथादिकं सङ्घकम्मं करेय्य. सह वा सेय्यं कप्पेय्याति नानूपचारेपि एकच्छन्ने निपज्जेय्य. तत्थ आमिसपरिभोगे एकप्पयोगेन बहूपि ददतो वा गण्हतो वा एकं पाचित्तियं, विच्छिन्दने सति पयोगे पयोगे पाचित्तियं. धम्मसम्भोगे पदादीहि उद्दिसन्तस्स वा उद्दिसापेन्तस्स वा पदसोधम्मे वुत्तनयेन, संवासे कम्मपरियोसानवसेन, सहसेय्याय एकस्मिं निपन्ने इतरस्स निपज्जनप्पयोगवसेन आपत्तिपरिच्छेदो वेदितब्बो.

सावत्थियं छब्बग्गिये आरब्भ अरिट्ठेन भिक्खुना सद्धिं सम्भुञ्जनवत्थुस्मिं पञ्ञत्तं, साधारणपञ्ञत्ति, अनाणत्तिकं, उक्खित्तके वेमतिकस्स, अनुक्खित्तके उक्खित्तकसञ्ञिनो चेव वेमतिकस्स च दुक्कटं. उभोसु अनुक्खित्तकसञ्ञिस्स, ‘‘ओसारितो’’ति वा ‘‘तं दिट्ठिं पटिनिस्सट्ठो’’ति वा जानन्तस्स, उम्मत्तकादीनञ्च अनापत्ति. अकतानुधम्मता, जानना, सम्भोगादिकरणन्ति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन पण्णत्तिवज्जं, तिचित्तं, तिवेदनन्ति.

उक्खित्तसम्भोगसिक्खापदवण्णना निट्ठिता.