१. सञ्चिच्चसिक्खापदवण्णना

सप्पाणकवग्गस्स पठमे पाणोति तिरच्छानगतपाणो अधिप्पेतो. तं खुद्दकम्पि महन्तम्पि मारेन्तस्स पाचित्तियमेव, महन्ते पन उपक्कममहन्तताय अकुसलं महन्तं होति.

सावत्थियं उदायित्थेरं आरब्भ पाणं जीविता वोरोपनवत्थुस्मिं पञ्ञत्तं, साधारणपञ्ञत्ति, साणत्तिकं, पाणे वेमतिकस्स, अपाणे पाणसञ्ञिनो, वेमतिकस्स वा दुक्कटं. अपाणसञ्ञिस्स, असञ्चिच्च, अजानन्तस्स, नमरणाधिप्पायस्स, उम्मत्तकादीनञ्च अनापत्ति. सेसं मनुस्सविग्गहे वुत्तनयमेवाति.

सञ्चिच्चसिक्खापदवण्णना निट्ठिता.