१०. उय्योधिकसिक्खापदवण्णना

दसमे उग्गन्त्वा उग्गन्त्वा एत्थ युज्झन्तीति उय्योधिकं, सम्पहारट्ठानस्सेतं नामं. बलस्स अग्गं जानन्ति एत्थाति बलग्गं, बलगणनट्ठानन्ति अत्थो. सेनाय वियूहं सेनाब्यूहं, सेनानिवेसस्सेतं नामं. अनीकस्स दस्सनं अनीकदस्सनं. अनीकं नाम ‘‘द्वादसपुरिसो हत्थी, तिपुरिसो अस्सो, चतुप्पुरिसो रथो’’तिइमिना (पाचि. ३१४) लक्खणेन तयो हत्थी पच्छिमकं हत्थानीकं, अस्सानीकरथानीकेसुपि एसेव नयो. चत्तारो पन आवुधहत्था पुरिसा पच्छिमकं पत्तानीकं. एतेसु यंकिञ्चि दस्सनाय गच्छतो पदे पदे दुक्कटं, दस्सनूपचारे ठत्वा पस्सतो पाचित्तियं, उपचारं पन विजहित्वा पुनप्पुनं पस्सतो पयोगे पयोगे पाचित्तियं. सेसं उय्युत्तसेनासिक्खापदे वुत्तनयेनेव वेदितब्बं, आपत्तिभेदो पनेत्थ नत्थेवाति.

उय्योधिकसिक्खापदवण्णना निट्ठिता.

अचेलकवग्गो पञ्चमो.