७. भिक्खुनिउम्मद्दापनसिक्खापदवण्णना

सत्तमे उम्मद्दापेय्याति उब्बट्टापेय्य. परिमद्दापेय्याति सम्बाहापेय्य. एत्थ च हत्थं अमुञ्चित्वा उब्बट्टने एकाव आपत्ति, मोचेत्वा मोचेत्वा उब्बट्टने पयोगगणनाय आपत्तियो. सम्बाहनेपि एसेव नयो.

सावत्थियं सम्बहुला भिक्खुनियो आरब्भ भिक्खुनिया उम्मद्दापनपरिमद्दापनवत्थुस्मिं पञ्ञत्तं, गिलानाय, आपदासु, उम्मत्तिकादीनञ्च अनापत्ति. इध मग्गगमनपरिस्समोपि गेलञ्ञं, चोरभयादीहि सरीरकम्पनादयोपि आपदा. सेसं चतुत्थे वुत्तनयेनेव वेदितब्बन्ति.

भिक्खुनिउम्मद्दापनसिक्खापदवण्णना निट्ठिता.