३. सङ्घाणिसिक्खापदवण्णना

ततिये सङ्घाणिन्ति यंकिञ्चि कटूपगं. धारेय्याति कटियं पटिमुञ्चेय्य. एत्थापि ओमुञ्चित्वा ओमुञ्चित्वा धारेन्तिया पयोगगणनाय पाचित्तियं.

सावत्थियं अञ्ञतरं भिक्खुनिं आरब्भ सङ्घाणिं धारणवत्थुस्मिं पञ्ञत्तं. आबाधपच्चया कटिसुत्तं धारेन्तिया, उम्मत्तिकादीनञ्च अनापत्ति. सेसं वुत्तनयेनेव वेदितब्बं, इदं पन अकुसलचित्तन्ति.

सङ्घाणिसिक्खापदवण्णना निट्ठिता.