१३. असंकच्चिकसिक्खापदवण्णना

तेरसमे असंकच्चिकाति अधक्खकउब्भनाभिमण्डलसङ्खातस्स सरीरस्स पटिच्छादनत्थं अनुञ्ञातसंकच्चिकविरहिता. गामं पविसेय्याति एत्थ परिक्खित्तस्स गामस्स परिक्खेपं, अपरिक्खित्तस्स उपचारं अतिक्कमन्तिया वा ओक्कमन्तिया वा पठमपादे दुक्कटं, दुतिये पाचित्तियं.

सावत्थियं अञ्ञतरं भिक्खुनिं आरब्भ असंकच्चिकाय गामं पविसनवत्थुस्मिं पञ्ञत्तं. यस्सा पन संकच्चिकचीवरं अच्छिन्नं वा नट्ठं वा, तस्सा, गिलानाय, आपदासु, उम्मत्तिकादीनञ्च अनापत्ति. असंकच्चिकता, वुत्तपरिच्छेदातिक्कमो, अनुञ्ञातकारणाभावोति इमानेत्थ तीणि अङ्गानि. समुट्ठानादीनि एळकलोमसदिसानीति.

असंकच्चिकसिक्खापदवण्णना निट्ठिता.

छत्तुपाहनवग्गो नवमो.