११. अनापुच्छासिक्खापदवण्णना

एकादसमे भिक्खुस्स पुरतोति न अभिमुखमेवाति अत्थो, इदं पन उपचारं सन्धाय कथितन्ति वेदितब्बं. तस्मा भिक्खुस्स उपचारे अन्तमसो छमायपि ‘‘निसीदामि, अय्या’’ति अनापुच्छित्वा निसीदन्तिया पाचित्तियं.

सावत्थियं सम्बहुला भिक्खुनियो आरब्भ अनापुच्छा निसीदनवत्थुस्मिं पञ्ञत्तं, तिकपाचित्तियं, आपुच्छिते द्विकदुक्कटं. तस्मिं आपुच्छितसञ्ञाय, गिलानाय, आपदासु, उम्मत्तिकादीनञ्च अनापत्ति. भिक्खुस्स अनापुच्छा, उपचारे निसज्जा, अनुञ्ञातकारणाभावोति इमानेत्थ तीणि अङ्गानि. समुट्ठानादीनि कथिनसदिसानि, इदं पन किरियाकिरियन्ति.

अनापुच्छासिक्खापदवण्णना निट्ठिता.