१. छत्तुपाहनसिक्खापदवण्णना

छत्तवग्गस्स पठमे छत्तुपाहनन्ति पदभाजने (पाचि. ११७८-११८२) वुत्तलक्खणं छत्तञ्च उपाहनायो च. धारेय्याति परिभोगवसेन मग्गगमने एकप्पयोगेनेव दिवसम्पि धारेन्तिया एका आपत्ति. सचे पन तादिसं ठानं पत्वा छत्तम्पि अपनामेत्वा उपाहनापि ओमुञ्चित्वा पुनप्पुनं धारेति, पयोगगणनाय पाचित्तियं.

सावत्थियं छब्बग्गिया भिक्खुनियो आरब्भ छत्तुपाहनधारणवत्थुस्मिं पञ्ञत्तं, ‘‘अगिलाना’’ति अयमेत्थ अनुपञ्ञत्ति, छत्तस्सेव उपाहनानंयेव वा धारणे दुक्कटं, अगिलानाय तिकपाचित्तियं, गिलानाय द्विकदुक्कटं. गिलानसञ्ञाय पन, आरामे आरामूपचारे धारेन्तिया, आपदासु, उम्मत्तिकादीनञ्च अनापत्ति. उभिन्नं धारणं, अनुञ्ञातकारणाभावोति इमानेत्थ द्वे अङ्गानि. समुट्ठानादीनि एळकलोमसदिसानीति.

छत्तुपाहनसिक्खापदवण्णना निट्ठिता.