७-८. सिक्खमाननवुट्ठापनपठमदुतियसिक्खापदवण्णना

सत्तमे सा पच्छाति सिक्खमानाय उपसम्पदाय याचियमानाय सा भिक्खुनी एवं वत्वा लद्धे चीवरे पच्छा असति अन्तराये ‘‘नेव वुट्ठापेस्सामि, न वुट्ठापनाय उस्सुक्कं करिस्सामी’’ति धुरं निक्खिपेय्य, तस्सा सह धुरनिक्खेपेन पाचित्तियन्ति. अट्ठमेपि एसेव नयो.

उभयम्पि सावत्थियं थुल्लनन्दं आरब्भ एतेसु वत्थूसु पञ्ञत्तं, द्वीसुपि सति अन्तराये, परियेसित्वा अलभन्तिया, गिलानाय, आपदासु, उम्मत्तिकादीनञ्च अनापत्ति. उभयत्थ ‘‘एवाहं तं वुट्ठापेस्सामी’’ति पटिञ्ञा, आकङ्खितनिप्फत्ति, पच्छा धुरनिक्खेपो, अनुञ्ञातकारणाभावोति इमानेत्थ चत्तारि अङ्गानि. समुट्ठानादीनि समनुभासनसदिसानीति.

सिक्खमाननवुट्ठापनपठमदुतियसिक्खापदवण्णना निट्ठिता.