१२. अनुवस्ससिक्खापदवण्णना

द्वादसमे अनुवस्सन्ति अनुसंवच्छरं. एवं वुट्ठापेन्तियापि वुत्तनयेनेव पाचित्तियं.

सावत्थियं सम्बहुला भिक्खुनियो आरब्भ अनुवस्सं वुट्ठापनवत्थुस्मिं पञ्ञत्तं. एकन्तरिकं वुट्ठापेन्तिया, उम्मत्तिकादीनञ्च अनापत्ति. अनुवस्सता, वुट्ठापनन्ति इमानेत्थ द्वे अङ्गानि. समुट्ठानादीनि एकादसमे वुत्तनयानेवाति.

अनुवस्ससिक्खापदवण्णना निट्ठिता.