१०. दुतियसहजीविनिसिक्खापदवण्णना

दसमे नेव वूपकासेय्याति न गहेत्वा गच्छेय्य. न वूपकासापेय्याति ‘‘इमं, अय्ये, गहेत्वा गच्छाही’’ति अञ्ञं न आणापेय्य. पाचित्तियन्ति धुरे निक्खित्तमत्ते पाचित्तियं.

सावत्थियं थुल्लनन्दं आरब्भ सहजीविनिया अवूपकासनवत्थुस्मिं पञ्ञत्तं. सति पन अन्तराये, परियेसित्वा दुतियिकं अलभन्तिया, गिलानाय, आपदासु, उम्मत्तिकादीनञ्च अनापत्ति. सहजीविनिता, वूपकासवूपकासापने धुरनिक्खेपो, अनुञ्ञातकारणाभावोति इमानेत्थ तीणि अङ्गानि. समुट्ठानादीनि समनुभासनसदिसानीति.

दुतियसहजीविनिसिक्खापदवण्णना निट्ठिता.

गब्भिनीवग्गो सत्तमो.