८. ओवादसिक्खापदवण्णना

अट्ठमे ओवादायाति गरुधम्मस्सवनत्थाय. संवासायाति उपोसथपुच्छनत्थाय चेव पवारणत्थाय च. पाचित्तियन्ति ‘‘एतेसं अत्थाय न गच्छामी’’ति धुरं निक्खित्तमत्ते पाचित्तियं.

सक्केसु छब्बग्गिया भिक्खुनियो आरब्भ ओवादाय अगमनवत्थुस्मिं पञ्ञत्तं. अन्तराये पन सति, परियेसित्वा दुतियिकं अलभन्तिया, गिलानाय, आपदासु, उम्मत्तिकादीनञ्च अनापत्ति. ओवादसंवासानं अत्थाय अगमनं, अनुञ्ञातकारणाभावोति इमानेत्थ द्वे अङ्गानि. समुट्ठानादीनि पठमपाराजिकसदिसानि, इदं पन अकिरियं, दुक्खवेदनन्ति.

ओवादसिक्खापदवण्णना निट्ठिता.