२. भिक्खुअक्कोसनसिक्खापदवण्णना

दुतिये अक्कोसेय्याति दसन्नं अक्कोसवत्थूनं अञ्ञतरेन सम्मुखा वा परम्मुखा वा अक्कोसेय्य. परिभासेय्याति भयमस्स उपदंसेय्य. पाचित्तियन्ति तस्सा एवं करोन्तिया पाचित्तियं.

वेसालियं छब्बग्गिया भिक्खुनियो आरब्भ आयस्मन्तं उपालिं अक्कोसनवत्थुस्मिं पञ्ञत्तं, तिकपाचित्तियं, अनुपसम्पन्ने तिकदुक्कटं, अत्थधम्मअनुसासनिपुरेक्खाराय, उम्मत्तिकादीनञ्च अनापत्ति. उपसम्पन्नता, अक्कोसनपरिभासनं, अत्थपुरेक्खारतादीनं अभावोति इमानेत्थ तीणि अङ्गानि. समुट्ठानादीनि अदिन्नादानसदिसानि, इदं पन दुक्खवेदनन्ति.

भिक्खुअक्कोसनसिक्खापदवण्णना निट्ठिता.