८. चीवरदानसिक्खापदवण्णना

अट्ठमे समणचीवरन्ति कप्पकतं निवासनपारुपनुपगं, एवरूपं ठपेत्वा पञ्च सहधम्मिके मातापितरो च यस्स कस्सचि गहट्ठस्स वा पब्बजितस्स वा परिच्चजित्वा देन्तिया पाचित्तियं.

सावत्थियं थुल्लनन्दं आरब्भ अगारिकस्स समणचीवरदानवत्थुस्मिं पञ्ञत्तं, भिक्खुनो दुक्कटं. मातापितूनं परिच्चजित्वापि, अञ्ञेसं तावकालिकमेव देन्तिया, उम्मत्तिकादीनञ्च अनापत्ति. समणचीवरता, ठपेत्वा सहधम्मिके च मातापितरो च अञ्ञेसं दानं, अतावकालिकताति इमानेत्थ तीणि अङ्गानि. समुट्ठानादीनि सञ्चरित्तसदिसानीति.

चीवरदानसिक्खापदवण्णना निट्ठिता.