१. लसुणसिक्खापदवण्णना

पाचित्तियेसु लसुणवग्गस्स ताव पठमे लसुणन्ति मगधरट्ठे जातं आमकं भण्डिकलसुणमेव, न एकद्वितिमिञ्जकं. तञ्हि ‘‘खादिस्सामी’’ति पटिग्गण्हन्तिया दुक्कटं, अज्झोहारे अज्झोहारे पाचित्तियं.

सावत्थियं थुल्लनन्दं आरब्भ लसुणं हरापनवत्थुस्मिं पञ्ञत्तं, तिकपाचित्तियं, अलसुणे द्विकदुक्कटं. तस्मिं पन अलसुणसञ्ञाय, पलण्डुके, भञ्जनके, हरितके, चापलसुणे, सूपसम्पाके, मंससम्पाके, तेलसम्पाके, साळवे, उत्तरिभङ्गे, उम्मत्तिकादीनञ्च अनापत्ति. आमकलसुणञ्चेव, अज्झोहरणञ्चाति इमानेत्थ द्वे अङ्गानि. समुट्ठानादीनि एळकलोमसदिसानीति.

लसुणसिक्खापदवण्णना निट्ठिता.