परिक्खारहारवण्णना

आघातादीनं ‘‘अनत्थं मे अचरी’’तिआदीनि (ध. स. १२३७; विभ. ९०९) च एकूनवीसति आघातवत्थूनि हेतु. आनन्दादीनं आरम्मणे अभिसिनेहो हेतु. सीलस्स हिरिओत्तप्पं अप्पिच्छतादयो च हेतु. ‘‘गम्भीरा’’तिआदिना वुत्तधम्मस्स सब्बापि पारमियो हेतु, विसेसेन पञ्ञापारमी. दिट्ठीनं असप्पुरिसूपस्सयो, असद्धम्मस्सवनं, मिच्छाभिनिवेसेन अयोनिसोमनसिकारो च अविसेसेन हेतु, विसेसेन पन सस्सतवादादीनं अतीतजातिअनुस्सरणादि हेतु. वेदनानं अविज्जातण्हाकम्मानि फस्सो च हेतु. अनुपादाविमुत्तिया अरियमग्गो हेतु. पञ्ञापनस्स अयोनिसोमनसिकारो हेतु. तण्हाय संयोजनियेसु अस्सादानुपस्सना हेतु. फस्सस्स छळायतनानि, छळायतनस्स नामरूपं हेतु. भवनेत्तिसमुच्छेदस्स विसुद्धिभावना हेतूति अयं परिक्खारो हारो.