नेतंठानंविज्जतिवारवण्णना

१३१. तस्स पच्चयस्साति फस्सपच्चयस्स दिट्ठिवेदयितेति दिट्ठिया पच्चयभूते वेदयिते, फस्सपधानेहि अत्तनो पच्चयेहि निप्फादेतब्बेति अत्थो. विनापि चक्खादिवत्थूहि, सम्पयुत्तधम्मेहि च केहिचि वेदना उप्पज्जति, न पन कदाचि फस्सेन विनाति फस्सो वेदनाय बलवकारणन्ति आह ‘‘बलवभावदस्सनत्थ’’न्ति. सन्निहितोपि हि विसयो सचे फुसनाकाररहितो होति चित्तुप्पादो, न तस्स आरम्मणपच्चयेन पच्चयो होतीति फस्सोव सम्पयुत्तधम्मानं विसेसपच्चयो. तथा हि भगवता चित्तुप्पादं विभजन्तेन फस्सोयेव पठमं उद्धटो, वेदनाय पन अधिट्ठानमेव.