४. गावीउपमासुत्तवण्णना

३५. चतुत्थे पब्बतचारिनीति पकतिया पब्बते बहुलचारिनी. अखेत्तञ्ञूति (विसुद्धि. महाटी. १.७७) अगोचरञ्ञू. समाधिपरिपन्तानं विसोधनानभिञ्ञताय बालो. झानस्स पगुणभावापादनवेय्यत्तियस्स अभावेन अब्यत्तो. उपरिझानस्स पदट्ठानभावानवबोधेन अखेत्तञ्ञू. सब्बथापि समापत्तिकोसल्लाभावेन अकुसलो. समाधिनिमित्तस्स वा अनासेवनाय बालो. अभावनाय अब्यत्तो. अबहुलीकारेन अखेत्तञ्ञू. सम्मदेव अनधिट्ठानतो अकुसलोति योजेतब्बं. उभतो भट्ठोति उभयतो झानतो भट्ठो. सो हि अप्पगुणताय न सुप्पतिट्ठितताय सउस्साहोपि विनासतो असामत्थियतो च झानद्वयतो परिहीनो.

गावीउपमासुत्तवण्णना निट्ठिता.