५-९. गण्डसुत्तादिवण्णना

१५-१९. पञ्चमे मातापेत्तिकसम्भवस्साति मातितो च पितितो च निब्बत्तेन मातापेत्तिकेन सुक्कसोणितेन सम्भूतस्स. उच्छादनधम्मस्साति उच्छादेतब्बसभावस्स. परिमद्दनधम्मस्साति परिमद्दितब्बसभावस्स. एत्थ च ओदनकुम्मासूपचयउच्छादनपदेहि वड्ढि कथिता, अनिच्चभेदनविद्धंसनपदेहि हानि. पुरिमेहि वा समुदयो, पच्छिमेहि अत्थङ्गमोति एवं चातुमहाभूतिकस्स कायस्स वड्ढिपरिहानिनिब्बत्तिभेदा दस्सिता. सेसं सुविञ्ञेय्यमेव. छट्ठादीनि उत्तानत्थानि.

गण्डसुत्तादिवण्णना निट्ठिता.