९. अनुस्सतिट्ठानसुत्तवण्णना

९. नवमे अनुस्सतियो एव दिट्ठधम्मिकसम्परायिकादिहितसुखानं कारणभावतो ठानानीति अनुस्सतिट्ठानानि. बुद्धगुणारम्मणा सतीति यथा बुद्धानुस्सति विसेसाधिगमस्स ठानं होति, एवं ‘‘इतिपि सो भगवा’’तिआदिना बुद्धगुणे आरब्भे उप्पन्ना सति. एवं अनुस्सरतो हि पीति उप्पज्जति, सो तं पीतिं खयतो वयतो पट्ठपेत्वा अरहत्तं पापुणाति. उपचारकम्मट्ठानं नामेतं गिहीनम्पि लब्भति. उपचारकम्मट्ठानन्ति च पच्चक्खतो उपचारज्झानावहं कम्मट्ठानपरम्पराय सम्मसनं याव अरहत्ता लोकियलोकुत्तरविसेसावहं. एस नयो सब्बत्थ.

अनुस्सतिट्ठानसुत्तवण्णना निट्ठिता.